[Resumo extraido da fonte]

Na estructura interna da Orde do Temple nos reinos de Galicia, León e Castela, está á cabeza da xerarquía o Mestre provincial. Nos primeiros decenios a cosa non aparece moi definida. Así, Hugo Rigaud, Mestre en Languedoc, recibe como freire templario ao conde de Barcelona, en 1131, entendendo Martínez Díez (1993: 62) que foi o encargado da implantación do Temple nos reinos hispánicos. Alain Demurguer (1987: 62) pensa, sen embargo, que foi Raimundo Bernard, un dos primeiros templarios recrutados en Europa, o encargado de difundir o Temple na Península por Hugo Rigaud. Na historiografía portuguesa hai bastante confusión, anque todos pensan que o primeiro Mestre foi Guilherme Ricardo: Paraschi (1992: 23-25) -que reproduce en facsímile varias obras de autores antigos- sustenta a teoría de que houbo, nun primeiro momento, varios Mestres: Guilherme Ricardo e Raimundo Bernard, que actuaron conxuntamente ata 1139, cando toma posesión Hugo Martoniense. Tamén Viterbo (1966: II, 583) sitúa a Guilherme Ricardo como primeiro Maestre. No que non están de acordo, sen embargo, é na duración do seu mandato, xa que Viterbo pensa que gobernou no ano 1128 e Bernardo da Costa (un dos autores recollidos por Paraschi, en 1139, mentres que Vieira de S. Guimaraes cre tamén que foi primeiro Guilherme Ricardo e, a continuación, Raimundo Bernard) sendo o segundo, en opinión de Viterbo e otros autores, Raimundo Bernard (Viterbo, 1966: II, 585-587).