Texto campaña (galego)

O proxecto FRONTESPO naceu en 2015 co obxectivo de documentar a cultura do territorio fronteirizo entre España e Portugal. Na web https://www.frontespo.org poden consultarse algúns dos recursos que fomos compilando estes anos (corpus oral, bibliografía multidisciplinar, tesouro léxico, etc.), sempre en constante proceso de actualización e dispoñibles de balde e sen necesidade de rexistro.

Como parte das nosas investigacións, desenvolvemos unha serie de cuestionarios en liña, que poden responderse con facilidade dende un ordenador ou desde un teléfono móbil. Están dirixidos a persoas maiores de 18 anos que sexan naturais dalgunha localidade situada a menos de 20 km da liña de fronteira (aínda que agora vivan noutro sitio).

Os cuestionarios 1 e 2 piden que os informantes graven o seu testemuño (en audio ou en vídeo) sobre o modo de vida na Raia, tanto antigamente como na actualidade, con duración libre: historias do contrabando, festas, tradicións…

No cuestionario 3 pídese que os informantes digan os nomes de diferentes seres vivos e obxectos da vida cotiá, observando unha serie de imaxes. Ademais dos nomes actuais, é moi interesante que expliquen se os maiores empregaban outras denominacións.

Finalmente, o cuestionario 4 pide respostas breves a unha serie de situacións da vida cotiá (que fai nun día normal? como se cociña algún prato típico?…).

Sería ideal que se respondesen todos os cuestionarios, pero poden responder só a algúns deles (agradeceriámoslles, en todo caso, que priorizasen o 3 e o 4).

O texto dos cuestionarios está dispoñible en español e en portugués, pero pode responderse na lingua habitual da persoa (español, galego, portugués, mirandés…). É fundamental que se responda de modo natural, na mesma lingua e variedade que se utiliza habitualmente en casa, coma se estivesen con alguén da familia ou cunha persoa próxima.

Agradeceriámoslles moito que, na medida das súas posibilidades, colaborasen con nós, completando tantos cuestionarios como fose posible. Tamén sería de grande utilidade que axudasen a responder persoas maiores que puidesen ter algunha dificultade coa tecnoloxía. Por exemplo, nenos e mozos poderían conversar cos maiores coa desculpa destes cuestionarios e, así, fomentar o diálogo interxeracional. Dende logo, tamén sería de moita axuda que difundisen a iniciativa nas súas redes.

Ademais da publicación que se vaia facendo na web do noso proxecto, comprometémonos a enviar todas as gravacións que nos solicite unha asociación, colexio, familia, etc., para que poidan ter unha copia do seu patrimonio inmaterial e traballar con ela como estimen oportuno.

Quedamos, por suposto, á súa disposición para esclarecer calquera dúbida. Tamén teriamos todo o interese en poder difundir o seu labor nas redes sociais e en acoller nas nosas bases de datos calquera tipo de material que recolleran ou elaboraran e que poida ser de interese para a cultura da Raia.

Esta campaña estará aberta ata o 30 de xuño de 2025 (sen posibilidade de prórroga).

ENQUISAS

1. Recolla de testemuños (audio ou vídeo) sobre a vida na fronteira:

- Texto en español: https://survey.phonic.ai/67f63df50ea2de30fabb42f2

- Texto en portugués: https://survey.phonic.ai/67f6735312d341e881fc03fc

2. Recolla de testemuños (audio ou vídeo) sobre a lingua na fronteira e relacións co outro país:

- Texto en español: https://survey.phonic.ai/67f65b4012d341e881fc03f5

- Texto en portugués: https://survey.phonic.ai/67f6626ca72701cff0ee570d

3. Cuestionario de imaxes sobre as palabras da Raia

- Texto en español: https://survey.phonic.ai/67fb903422b85323c7045da0

- Texto en portugués: https://survey.phonic.ai/67fb9288a2fe1b0116b31956

4. Cuestionario de situacións da vida diaria: