[Resumo extraído da fonte] 

Hai uns dous anhos, fúrun apersentados an Miranda trés lhibros, eiditados pul Instituto de Desenvolvimento Social (IDS): un de Valdemar Fernandes, subre quelóquios mirandeses; outro de Mário Correia, subre ls gueiteiros mirandeses; i un terceiro de Carlos Ferreira, cun cuntas de la tradiçon oural, an mirandés, mas amanhadas a la sue moda. Nesse mesmo die, a la nuite, telfonei a mius pais, cumo questumo fazer. A cierta altura de la cumbersa, preguntei-le a miu pai:
- Anton, por adonde andubo hoije?
- Hoije fumus a Miranda, al salimiento de l libro de Carlos.
- Al quei?, preguntei.
- Ai, pus al salimiento de l libro de tou armano!
- Ah, yá se me habie squecido, dixe-le you.
La cumbersa cuntinou, mas la palabra “salimiento”, que oubira pula purmeira beç cun aquel segneficado, quedou-me a martelhar na cabeça. La palabra que you haberie ousado naquel caso serie “lançamiento de l libro”, l que nun passarie dun amirandesamiento de la palabra pertuesa ‘lançamento’.