[Sinopsis reproducida de BILEGA]

O autor trata de "plasmar [...] un conjunto de tradiciones orales, para conservar y preservar para el futuro, un acervo cultural que es muy posible que finalice en la generación actual" (p. 14 da nova ed.). A parte central deste traballo de carácter misceláneo está constituída por un repertorio léxico de 2.000 entradas (3.429 na nova ed.) que corresponden a voces recollidas en Sampil, Castellanos, Galende, Ungilde, Puebla de Sanabria e Alta Sanabria, aínda que o autor non precisa o lugar en que foi recollida cada forma. Presenta a seguinte microestrutura: lema, variantes e referencias internas, definicións; ás veces indícase a localización xeográfica das formas e os nomes científicos das plantas. Inclúe tamén breves seccións sobre a historia de Sanabria, a xeografía, a xeoloxía e a hidrografía, ademais dunha caracterización xeral do sanabrés (p. 25-35 da nova ed.). Cerra o traballo un cap. sobre folclore cunha mínima recompilación de cantigas populares sanabresas (p. 281-291 da nova ed.), un apdo. sobre a cultura do liño (p. 275-278 da nova ed.) e outro sobre medidas sanabresas (p. 295-297 da nova ed.).