[Resumen extraído de la fuente original]

Este encontro monográfico sobre os lindeiros da galeguidade responde, sen dúbida, a unha importante inquietude de moitos galegos e céntrase nunhas comarcas que xa foron obxecto de importantes investigacións. Ata agora, con todo, non se tomara en consideración a realización dunha extensa investigación antropolóxica, que se asentase nesta zona e tratase de estudiala culturalmente como lindeiros da galeguidade. Este é o título da investigación que presentamos e que representa unha primicia nestes momentos en curso. Investigación que patrocina o Consello da Cultura Galega e que foi desencadeante deste curso no que se dan cita investigadores procedentes de diferentes especialidades científicas con traballo nesta área xeográfica. Certamente este curso supón para a nosa investigación un estímulo e unha fonte de suxerencias de grande importancia. As contribucións doutros antropólogos, así como de historiadores, lingüistas, arquitectos, etc., deben ser recollidas polo noso equipo de investigadores e reinterpretadas dentro do marco de inquietudes peculiares desta investigación, dado que o enfoque que a preside pode dotalas dun novo sentido. É dicir, o noso traballo sobre os límites da galeguidade, supón un conxunto de preguntas teóricas ante as que os datos xa coñecidos poden responder dun xeito novo e que esixirán o que estes sexan completados e enriquecidos con novas pescudas. Tratarei sucintamente nesta presentación, de describir calé o obxectivo teórico, que pode dotar de novidade e de orixinalidade este empeño e que mereceu espertar non só o interese senón o entusiasmo, do ata hai pouco Presidente do Consello, o noso querido e lembrado D. Ramón Piñeiro.