Géstios que son palabras criadoras

Tipologia: 
Artigo de revista
Título da revista: 
Diário de Trás-os-Montes
Ano: 
2005
Número: 
18 de Febreiro de 2005
Sinopse do conteúdo: 

[Resumo extraido da fonte] 

Ye mui defícele, para quien bibe nua cidade, tener l’ouportunidade de formar ua ambuça, esse géstio que ajunta las manos abiertas i queda a meicamino antre las manos apartadas i las manos puostas de quien reza. Para que habie de se fazer ua ambuça nua cultura ourbana adonde muita cousa fuora de nós yá sustituiu las manos a mais i a maior? L’ambuça ye un géstio de cultura de l cuorpo que mos pon diretamente an relaçon cula natureza sin percisar d’antermediairos i la cultura ourbana assenta nua natureza que yá nun ye natural, mas criada al modo para eilha. Cuido mesmo que será un de ls géstios a que poderiemos chamar fundadores de la nuossa houmanidade, aqueilhes géstios que cuntrebuírun para que, hai miles i miles ou talbeç milhones d’anhos, deixáramos de andar an quatro patas i passássemos a ousar solo dues, culas manos lhibres para outras cousas. Assi, puode dezir-se que l’ambuça ye un géstio lhibertador, criador. Dende la cuntradiçon: se esse géstio serbiu para mos lhibertar, cumo ye que, nua cibelizaçon ourbana que ye cunsidrada la mais abançada, yá nun tenemos percison del? Se quiero agarrar ua fuolha, ajunto dous dedos cumo uas tanazes; se agarro un lhibro, stendo-lo an riba la mano abierta cumo ua mesa; uso las manos para me bestir, para comer, para sacar l denheiro dua caixa eiletrónica, para ampurrar ua puorta, you sei alhá, miles de géstios feitos culas manos i que nin dou por eilhes. Mas ye mui ralo que un desses géstios seia ua ambuça. Talbeç solo indo als jogos de ls ninos, nas sues custruçones d’arena i tierra, inda seia possible achar esse géstio cula sue frescura oureginal, ua fuorça criadora i trasformadora.

Língua: 
Área geográfica: 
Última modificação: 
27/04/2022 - 09:28