[Sinopsis reproducida de BILEGA]

O estudo das variedades dialectais da área de transición entre o galego e o leonés denominada Alta Sanabria ofrécelle ao autor a posibilidade de reflexionar sobre aspectos teóricos do comportamento lingüístico das comunidades que reflicten diversos graos de variabilidade. Para investigar sobre as ditas variedades dialectais organiza o artigo nos seguintes apdos.: 1) "Introducción" (p. 579-581); 2) "Problemas dialectológicos" (p. 581-588). Neste segundo apdo. estúdase a zona de Sanabria como un 'continuum' dialectal, analizando as variedades transicionais do galego exterior sanabrés e ofrecendo algunhas observacións sobre a natureza das variedades fronteirizas; 3) "Problemas sociolingüísticos" (p. 588-598), en que, mediante a aplicación dun modelo de cuestionario sociolingüístico, se analiza a competencia lingüística da comunidade de fala galega de Sanabria e as súas actitudes respecto á identidade etnolingüística. Finalmente, o apdo. 3 tamén ofrece algunhas observacións sobre a planificación lingüística que inclúen novas propostas normalizadoras para o ensino.